PAGYAKAP

Noong bata pa ako

Pinangarap kong agad na lumaki

Pinangarap kong agad na tumanda

Kasi sabi ko mukhang masaya

Nauunawaan ang halos lahat

Kung bakit ganito, kung bakit ganyan.

Kaya naisipan kong magtanong

Binuksan ang isipan

Natutunan ang magbilang

Isa, dalawa, tatlo, apat….

Pagkatapos ay natutunan ko ring magsulat….

Ngunit naibulong sa sarili, “mukhang hindi pa ito sapat.”

Sinubukan kong buksan ang mga pahina

Pinilit maunawaan ang mga salitang binubuo ng mga letra

Hanggang sa natutunan ko na rin ang magbasa!

Kasabay nito ako’y tinuruan ng ina at ng ama,

Manalangin kung ako’y may hihilingin

Ibulong ko raw sa itaas at ipagkakaloob rin.

Maghintay kahit na matagal

Maging matatag kahit na nahihirapan

Dahil pasasaan pa’t ang lahat ng hirap

May mga mabuting bungang katapat.

Nabuo na ang pag-asa

Na kaya kong harapin ang mundo

Nang walang halong takot at pag-iimbot.

Pero alam mo, akala ko lang pala iyon….

Dahil bata pa ako noon….

Nang ako’y tumatanda,

Nalaman kong may mga bagay na hindi mabisa

Pagbilang, pagsulat, at pagbasa’y hindi sapat.

Dahil kung may higit pa na dapat malaman

Hindi lang pala sa utak ang dapat na lagyan.

Kundi pati puso’y dapat may laman ng pagmamahal.

Hindi ka makakatakas sa nakaraan…

Kung hindi walang pagtanggap.

Walang pagyakap.

Walang tuldok.

Walang pagtatapos.

Walang esensya ang matematika kung walang pakahulugan…

Nalaman kong kahit na sabihin kong…

Isang milyong beses akong nasaktan

Hindi iyon sasapat para mailarawan

Kung ano ang tunay na karanasan at naramdaman.

Kung paanong nadurog ang puso kapag nahihirapan

At kung gaano rin ako naging maligaya simula ng masilayan ka!

Hindi sapat ang magbilang…

Dahil kung may higit pa na dapat malaman

Hindi lang pala sa utak ang dapat na lagyan.

Kundi pati puso’y dapat may laman ng pagtanggap.

Hindi ka makakatakas sa nakaraan…

Kung walang pagtanggap.

Kung walang pagyakap.

Yung pagyakap at pagtanggap nang pinag

tagpi-tagping madilim na nakaraan.

Kung walang pagtutuldok

at walang pagtatapos.

Dapat na hawiin ang takot sa puso.

Subukan ang paglukso!

Huwag kang magpapako!

Gumising ka at may dahil may bukas!

Gumawa ka ng sarili mong bakas!