PAG- ASA

Image Source

Ako’y mula sa mumunting buto

Nangarap at nagsimulang umusbong

Ako na gawa ng Mahal na Panginoon

Saan kaya mapaparoon?

Lumago’t lumaki ay aking pinangarap

Madiligan at mabiyayaan ay aking nalasap

At mula sa itaas nasikatan

Pangarap na sana’y walang katapusan.

Patuloy na lumaki ako’t lumago

Pero bakit sa kalagitnaa’y may nagbago?

Ang dating tikas ay nahaluan ng panlulumo

Mga nasimulan ba’y magsisimula ng gumuho?

Pader ay nagsimula ng gumalaw

Kasikatan ng araw ay di na matanaw

Akong halaman na namulaklak

Patuloy bang mamumukadkad?

Paanong ang isang harang ay magigiba?

Ako’y hamak na halaman lamang

Ngunit may konting tindi pa ng pag-asa sa loob

Kahit na’ng takot ay nagsimula nang lumusob

Paano na ang kasikatan ng araw?

Tuluyan na ba itong sa aki’y mawawalay?

Nais pa sanang mahagkan ang init nito

Ngunit paano kung wala ng pagbabago.

Siguro’y mahihintay na lang

Umikot ang mundo at nawa’y masinagan,

Tulungan ng panahon na sana,

Balang araw’y ang pader ay magiba.

 Bumilis na sana ang ikot ng mundo

Para ako’y di na lubos na malungkot

Pader sana na pagkataas-taas

Nawa’y manghina sa ugat ko.